Pagbati! Padayon Tungo Sa Marami Pang Tagumpay

Sa mga mata ng karaniwang tao, maaaring ito ay isang simpleng pagtatapos na may magmamartsang taas-noo patungo sa entablado.

Maaaring sa iba, ito ay isang programa lamang na kung saan ay gagawaran ang mga estudyante ng diploma na sila’y nakapagtapos.

At para sa ilan, ito ay isang payak na pagkakataong magpasalamat sa mga taong tumulong, sumuporta, at humubog sa kanila sa kabuoan ng kanilang paglalakbay sa buhay-estudyante.

Ngunit, hindi ko tanaw ang inyong pagtatapos sa mata ng karaniwang tao.

Buhat ang inyong kultura at tradisyon, ang pagmartsa niyo'y ipinagmalaki ang lakas at tibay ng inyong loob.

Ang mga diploma na inyong tinanggap ay tanda ng inyong pagwawagi laban sa sistematikong paniniil na inyong dinadanas.

Sa huli, ang inyong pagtatapos ay naging isa sa mga iilang pagkakataon ninyong pabaunan kami ng matinding hamong matuto, umalam, at tumulong sa pagbabago.

Saksi ako sa pagtindig niyo laban sa pang-aapi gayundin sa pagsisimula ng pakikibakang itataguyod ang kapakanan ng inyong komunidad — at ng bayan.

Kahit sa malayong dako, nais ko rin kayong batiin at pabaunan.

Una, hiling ko'y sana hindi pa ito ang huling pagkakataon na makita ko kayong nagwawagi; at pangalawa, sabay natin ipagdiwang ang tagumpay na ating pang makakamit.

Ngunit hangga’t hindi pa tayo nagkikita muli, asahan niyong kasama niyo ako sa labang ito.

Hindi man ako kagaya niyo, sana’y malaman niyong kaisa niyo ako.

Muli, pagbati! Padayon tungo sa marami pang tagumpay!

Photos by: Rose and Pitik ni Ka efren